د اسرائیل پولیسو یکشنبه مې پنځمه ( غوایي ۱۶مه) په بیت المقدس کې د هوټل په یوې خونې چاپه ووهله چې د الجزیرې خبرې شبکې ترې د دفتر په توګه کار اخیست.
د اسرائیل یو چارواکي او پخپله د الجزیرې شبکې د پولیسو دا چاپه تائید کړې.
د اسرائیل پولیسو دا اقدام وروسته تر هغه وکړه چې د دې هیواد کابینې د الجزیرې د خپرونو د بندولو پریکړه وکړله.
یوه ویډیو چې د ایکس په شبکې کې خپره شوې پکې ښودل کیږې چې په ساده جامو کې یو شمیر کسان د ختیځ بیت المقدس په هوټل کې کامرې ښکته کوي چې د الجزیرې سرچینې له مخې د خپرونو لپاره ترې کار اخیستل کیده.
تر دې وړاندې د اسرائیل صدراعظم بنیامین نتنیاهو په یوې اعلامیې کې ویلي و چې په سمدستي توګه د الجزیرې د خپرونو بندولو پریکړه یې کړې.
د نتنیاهو دفتر لخوا په خپرې شوې اعلامیې کې راغلي: " زما د هدایت سره سم او د امنیتي کابینې د بحث کولو څخه وروسته، حکومت په اسرائیل کې د الجزیرې خپرونو بندولو باندې بحث وکړ."
د الجزیرې شبکې یوه اعلامیه خپره کړې چې ویلي یې دي: "د اسرائیل له خوا د خپلو جنایاتو د پټ ساتلو لپاره د خبریالانو په وژلو او نیولو سره زموږ د وظیفې د ترسره کولو مخه نه ده نیولې. "
په اسرائیل او فلسطیني سیمو کې د الجزیرې مسول ولید العمري ویلي چې دوی ته په اسرائیل کې د دې شبکې د بندیدو خبر ورکړل شوی او د دوی ټول نشراتي وسایل ضبط شوي دي.
د نتنیاهو کابیني د رایو په غوڅ اکثریت د الجزیرې خپرونې په اسرائیل کې تر هغه وخت بندولو پریکړه کړې چې تر څو چې په غزې کې د حماس پر ضد جګړه روانه وي.
د اسرائیل حکومت ویلي چې د الجزیرې تلویزیون د اسرائیل ملي امنیت ته ګواښ دی خو پدې هکله یې نور جزیات ندي ورکړي.
د ملګرو ملتونو د بشري حقونو ادارې په بیت المقدس کې د الجزیرې دفتر تړلو باندې انتقاد کړی.
دې نړیوالې ادارې د ایکس په شبکې کې لیکلي چې "ازاد او خپلواک مطبوعات د شفافیت او حساب ورکونې" لپاره مهم دي. په اعلامیې کې د اسرائیل د حکومت څخه غوښتل شوي چې خپله پریکړه بدله کړي.
د خبریالانو ژغورنې کمیټې هم د اسرائیل د حکومت دا پریکړه غندلې ده او ویلي یې دي چې دا ډول کړنې ښایي د هغو نړیوالو مطبوعاتو باندې د محدودیت لګولو پیل وي چې په اسرائیل کې فعالیت کوي.
د دې ادارې مشر ویلي چې د اسرائیل کابینه باید الجزیرې او ټولو نړیوالو مطبوعاتو ته په اسرائیل کې په ازاده توګه د فعالیت اجازه ورکړي.
فورم \ دبحث خونه